ഡിങ്കോൾഫിക്കേഷൻ 
****************

ശബ്ദ താരാവാലിയും ആംഗലേയവും 
പൈത്രിക ക്ലാസ്സിക്കുകളും 
പിതൃ ശൂന്യനെന്നു പട്ടം നല്കി 
തീണ്ടാപ്പാടകലെ തെമ്മാടിക്കുഴിയിൽ 
അടക്കം ചെയ്‌ത ഒരു പാവം ശൂദ്രൻ 

ബസ്‌ സ്റ്റോപ്പിൽ 
നവ മുകുളങ്ങൾ കണ്ണുകള്‍ കൊണ്ട്
കഥ പറഞ്ഞപ്പോളും


നഗരത്തിലെ പാർക്കിൽ
യുവ മിഥുനങ്ങൾ
കണ്ണടച്ച് ഇരുട്ടാക്കി വൃന്ദാവനം
സൃഷ്ടിച്ചപ്പോളും ...

അമ്പല നടയിലും, ആൽത്തറക്കരികിലും
പെരുന്നാൾ പ്രദക്ഷിണത്തിനും,
തെരുവു വാണിഭ കവലയിലും
മരണ വീട്ടിലും , കലാലയ ഇടനാഴികളിലും
അവർ കണ്ണുകളാൽ
പ്രണയത്തിന്റെ പുഞ്ചിരി കൈമാറിയപ്പോഴും
സദാചാര വാദികൾ
എന്റെ പേരിട്ടു വിളിച്ചു ..

ഒരു മനമാകാൻ പ്രതിജ്ഞ ചെയ്തുവർ
മോതിരങ്ങളെ കൈമാറുമ്പോൾ
കണ്ടു നിന്നവർ മൊഴിഞ്ഞു
രണ്ടു പേരും തമ്മിൽ നല്ല
'ഞാൻ' ആണെന്ന് ..

സർവകലാശാലയുടെ
വെബ്‌ സൈറ്റിൽ പരീക്ഷാ ഫലത്തിനായി
ഇല്ലാത്ത നമ്പർ തിരയുമ്പോഴും
അലസന്മാരുടെ കളിയെ
വിഡ്ഢി പെട്ടിക്ക് മുന്നിൽ
മഴ കീഴടക്കിയപ്പോഴും
നിരാശയോടെ നിങ്ങൾ പറഞ്ഞു
ഇത് വല്ലാത്ത 'ഞാൻ ' ആയിപ്പോയെന്നു

ആരാണ് ഞാൻ ?
ഒരു പാവം 'ഞാൻ' ...